Свято-Владимирский Храм

Аудио

На реках Вавилонских

На реках Вавилонских, тамо седохом и плакахом, внегда помянути нам Сиона.
На вербиих посреде его обесихом органы наша.
Яко тамо вопросиша ны пленшии нас о словесех песней и ведшии нас о пении: воспойте нам от песней Сионских.
Како воспоем песнь Господню на земли чуждей?
Аще забуду тебе, Иерусалиме, забвена буди десница моя.
Прильпни язык мой гортани моему, аще не помяну тебе, аще не предложу Иерусалима, яко в начале веселия моего.
Помяни, Господи, сыны Едомския, в день Иерусалимль глаголющия: истощайте, истощайте до оснований его.
Дщи Вавилоня окаянная, блажен иже воздаст тебе воздаяние твое, еже воздала еси нам.
Блажен иже имет и разбиет младенцы Твоя о камень.

 

Стихира Благовещению

Совет превечный открывая Тебе, Отроковице,
Гавриил предста, Тебе лобзая и вещая:
Радуйся, земле ненасеянная!
Радуйся, купино неопалимая!
Радуйся, глубино неудобозримая!
Радуйся, мосте, к небесем преводяй,
и лествице высокая, юже Иаков виде!
Радуйся, божественная стамно манны!
Радуйся, разрешение клятвы!
Радуйся, Адамово воззвание,
с Тобою Господь!

 

Величание

Архангельский глас / вопием Ти, Чистая: / радуйся, Благодатная, / Господь с Тобою.

 

Кондак Благовещения

Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

 

Cветилен Благовещению

Еже от века днесь познавается таинство Божие: / Бог Слово Сын Девы Марии за милосердие бывает, / и радость благовещения Гавриил провещавает. / С нимже возопием Ей: / радуйся, Мати Господня.

 

Задостойник Благовещению

Благовествуй, земле, радость велию, / хвалите, небеса, Божию славу. Яко одушевленному Божию кивоту, / да никакоже коснется рука скверных. / Устне же верных, Богородице, немолчно, / глас Ангела воспевающе, / с радостию да вопиют: / радуйся, Благодатная, / Господь с Тобою.

 

Песнь Богородицы

Величит душа Моя Господа, и возра́довася дух Мой о Бо́зе Спасе Моем.

        Честне́йшую херуви́м и сла́внейшую без сравнения серафим, без истления Бога Слова рождшую, сущую Богородицу, Тя величаем.

    Яко призре́ на смирение рабы Своея́, се бо от ныне ублажат Мя вси ро́ди.

       Честне́йшую херуви́м и сла́внейшую без сравнения серафим, без истления Бога Слова рождшую, сущую Богородицу, Тя величаем.

    Яко сотвори́ Мне величие Сильный, и свято имя Его, и милость Его в ро́ды родо́в боящимся Его.

        Честне́йшую херуви́м и сла́внейшую без сравнения серафим, без истления Бога Слова рождшую, сущую Богородицу, Тя величаем.

    Сотвори́ державу мышцею Своею, расточи́ гордыя мыслию сердца их.

        Честне́йшую херуви́м и сла́внейшую без сравнения серафим, без истления Бога Слова рождшую, сущую Богородицу, Тя величаем.

    Низложи́ сильныя со престол, и вознесе́ смиренныя; алчущия исполни благ, и богатящияся отпусти тщи.

        Честне́йшую херуви́м и сла́внейшую без сравнения серафим, без истления Бога Слова рождшую, сущую Богородицу, Тя величаем.

    Восприя́т Израиля отрока Своего, помянути милости, якоже глаго́ла ко отце́м нашим, Аврааму и семени его даже до века.

        Честне́йшую херуви́м и сла́внейшую без сравнения серафим, без истления Бога Слова рождшую, сущую Богородицу, Тя величаем.

 

Как нас найти